Takimet e njëmbëdhjeta tradicionale ndërkombëtare të bjeshkatarëve dhe alpinistëve

“SHARRI 2011”, 11-12 qershor 2011

Fjala përshëndetëse e Kryetarit të Federatës

Bjeshkatarë të dashur,

në fund të muajit maj dhe fillim të qershorit u shënuan dy ditë me karakter botëror, që në një mënyrë ose tjetër lidhen me bjeshkatarinë. Me 31 maj ishte Dita botërore pa duhan, e ne e dimë fare mirë mendimin dominues të bjeshkatarëve për pirjen e duhanit. Ndërsa me 5 qershor ishte Dita botërore e mjedisit që për vitin 2011 kishte temën “Natyra-Pyjet në shërbimin tuaj”.

Federata Bjeshkatare Alpiniste e Kosovës nëpërmes një njoftimi në webfaqen e saj u bëri thirrje të gjitha shoqërive anëtare që ta shënojnë këtë ditë dhe të demonstrojnë ngritjen e vetëdijes për ruajtjen dhe mbrojtjen e  mjedisit bjeshkatar. Por shoqëria bjeshkatare “Sharri” i kishte përvjelë mëngët shumë me herët. Qysh në fillim të muajit prill ajo kishte marr pjesë në mbjelljen e 1500 fidanëve në mes të fshatrave Lubizhdë dhe Skorobisht.

Takimet e njëmbëdhjeta me radhë “Sharri 2011” përveç që mbahen në frymën e njohjes së bjeshkatarëve mes veti, shkëmbimit të përvojave tona nëpër ekspedita të ndryshme, kanë edhe karakterin edukues të ndërgjegjësimit dhe ruajtjes së ambientit që na rrethon. Kjo e fundit është njëra ndër shtyllat e bjeshkatarisë kosovare.

Përveç ndërgjegjësimit mbi mjedisin bjeshkatar, shoqëria “Sharri” është lidere në fushën e turizmit malor. Ajo përmes menaxhimit të drejtë të shtëpisë malore dhe rinovimit të saj ka krijuar kushte shumë të mira jo vetëm për akomodimin tonë por edhe për turistë potencial që vijnë nga vendet tjera. Organizimi i marshimeve dhe mundësia e akomodimit në shtëpinë malore është forma më e mirë dhe e drejtpërdrejtë e prezantimit të bukurive të vendit tonë dhe mënyra më e mirë ngritjes së qëndrueshme të imazhit të Republikës sonë të re.

Ju dëshiroi që gjatë shoqërimit tuaj dyditorë të kënaqeni me këto bukuri të Sharrit dhe së bashku me bjeshkatarët mysafir dhe vendor të ruani kujtimet më të bukura nga kjo pjesë e vendi tonë.

Sukses në pushtimin e majës së Korfit!

Arben Lila

Kryetar i Federatës Bjeshkatare Alpiniste të Kosovës

Prishtinë, 11 qershor 2011

Kampingu "Rrasa e Zogut", Bjeshkët e Junikut 11-12 qershor 2011, Pushtimi i Gjeravicës.

Fjala përshëndetëse e Kryetarit të Federatës

Bjeshkatarë të dashur,

Kampingu “Rrasa e Zogut” e organizuar nga shoqëria bjeshkatare alpiniste “Rrasa e Zogut” nga Juniku, ka një rëndësi të veçantë. Së pari ky kamping organizohet nga anëtarja më e re e Federatës dhe së dyti synon majën më të lartë të Kosovës, majën e Gjeravicës 2656m të lartë.  Edhe pse e re, Shoqëria Bjeshkatare Alpiniste “Rrasa e Zogut” përmes këtij kampingu po demonstron lidership në organizimin e ekspeditave me synim pikat më të larta bjeshkatare.

Si shoqëri që vjen nga njëra ndër komunat më të vjetra dhe më me nam, ShBA “Rrasa e Zogut” e kultivon dhe rrit  edhe më shumë namin e Junikut. Këtë nam Juniku e ka arritur dhe mbajtur përgjatë shumë viteve. Banorët e Junikut gjithmonë kanë qenë mikpritës, bujar dhe solidar. Pikërisht këto vlera duhet t’i bart dhe kultivojë shoqëria bjeshkatare “Rrasa e Zogut”.

Përmes këtij kampingu shpresoj dhe besoj që bjeshkatarë nga vende të ndryshme do të njihen më mirë mes veti, do të shkëmbejnë përvojat e tyre dhe do të japin kontributin e tyre në ruajtjen dhe mbrojtjen e mjedisit bjeshkatar. Motoja “Mos lerë asgjë prapa teje përveç gjurmëve tuaja dhe mos merr asgjë me vete përveç fotografive tuaja” duhet të jetë në mendjet tona gjatë të gjitha ekspeditave.

Pushtimi i majës së Gjeravicës nuk do të jetë i njëjtë dhe i lehtë për secilin prej nesh. Në bërthamën e saj bjeshkataria ka solidaritetin në mes të bjeshkatarëve dhe ky është i domosdoshëm për arritjen dhe pushtimin e Gjeravicës. Besoj që gjatë rrugës, më shumë se pushtimi i majës së Gjeravicës me çdo kusht, do të jetë shoqërimi dhe mbështetja e njëri tjetrit deri në arritjen e majës më të lartë të vendit tonë.

Sukses!

Arben Lila,

Kryetar i Federatës Bjeshkatare Alpiniste të Kosovës

Prishtinë, 10 qershor 2011